Bulkan Taal, nagbuga sang abo; Pag-evacuate sang mga residente sa banwa nga malapit sa bulkan, ginpatuman

By: JoMaque | Enero 13, 2020

Gin-evacuate ang linibo ka mga residente sa mga banwa nga malapit sa Bulkan taal matapos ginbatak sa alert level 4 ukon hazardous eruption imminent ang status sang bulkan kasunod sang pagbuga sini sang abo kahapon, Enero 12.

Ginpahayag ni National Disaster Risk Reduction Spokesman Mark Timbal nga ginhimo ini sa mga banwa sang Balete, San Nicolas, Talisay, Laurel kag Agoncillo sa Batangas ang precuationary evacuation sang nagbuga sang tuman ka taas nga mga abo nga naglab-ot tubtob 100 metro ang phreatic explosion sang bulkan.

Nabatiyagan man ang sunod-sunod nga pagtay-og sa palibot sang bulkan.

Suno sa PHIVOLCS, posible nga magluntad ang pyroclastic density currents kag volcanic tsunami bangud naapektuhan ang tubig kon padayon ang aktibidad sang bulkan. Halin ala-una kahapon sang hapon, ang bulkan ang nagpakita sang “increased steaming activity sa lima ka lugar sa sulod sang crater.

Ginakabalak-an sang ahensiya kon magpadayon ang pag-alburuto sang bulkan bangud posible nga dalayon ini nga maglupok sa masunod nga inadlaw.

Gin-abisuhan ang publiko nga likawan ang pagpadulong malapit sa bulkan.

Ang bilog nga volcano island ang ginakabig nga permanent danger zone kag ginabawalan ang permanente nga pag-istar.

Gindeklarar na nga wala sang klase kag opisina sa gobyerno sa NCR, CALABARZON kag Region 3 sa diin naglab-ot ang ash fall.

Pila man ka mga flights sa NAIA ang temporaryo nga kanselar.