Pavia LGU, nagpahimo sang mga tarpaulin kag signs agud magiyahan ang mga nagalabay sa gina-obra nga Ungka II flyover

By: Aine Grace Bravo | January 14, 2020

via Hotline

Pavia, Iloilo — Nagmato-mato pahimo sang tarpaulins kag directional signs ang Pavia local government unit (LGU) agud magiyahan ang mga nagalabay sa ginasuguran na construction nga Ungka II flyover.

Suno kay Pavia Mayor Luigi Gorriceta, may mga traffic schemes naman sila agud mahagan-hagan ang pagpugok sang trapiko sa corner Sen. Benigno Aquino Jr. Avenue kag Iloilo Circumferential Road.

Dapat kuntani suno sa iya nga Department of Public Works and Highways (DPWH) ang magpanguna sa precautionary measures, rerouting kag advisory para sa mga nagalabay sa area.

Nobyembre 29 sang nagligad nga tuig pa lang, nagpakigsapol na si Mayor Gorriceta kay Public Safety and Transportation Management Office (PSTMO) head Jeck Conlu kag mga alkalde sang mga banwa nga miembro sang Metro Iloilo-Guimaras Economic Development Council (MIGEDC) para sa nasambit nga proyekto.

Na-istoryahan sa amo nga sinapol nga ang contractor ang ma-provide sang masobra 20 ka auxiliaries kag magabutang sang mga warning signage sa project site, pero wala man natuman suno sa alkalde.

Ginpabutyag sang alkalde nga obserbasyon pa lang kuntani ang himuon sang LGU sa pagsugod sang proyekto kag ma-adjust sila kun may kulang ang DPWH.