(UPDATE) Duha ka pulis kag isa ka soldado, lakip sa mga nagataya samtang nagatan-aw sang live streaming sang bulang sa Janiuay –IPPO official

By: Aine Grace Bravo | January 16, 2020

via Angel Mae Ciudad

Iloilo — May pulis kag soldado nga kaupod sa mga nagataya samtang naglantaw sang live streaming sang bulang sa Janiuay sang gin-operate sang Iloilo Police Provincial Office Special Operations Group sang Enero 14 sang gab-i.

Ginkumpirmar ni PMAJ Jonathan Pinuela, chief sang IPPO-SOG, nga laklip ang duha ka pulis kag isa ka soldado sa mga nakapalagyo sang ila gin-operate, samtang 82 lang ang nadakpan.

Nahibaluan na lang nila nga may pulis kag soldado sa area bangud sa na-recover nga duha ka 9mm kag isa ka caliber 45 sa vault nga ginabilinan sang mga gamit antes makasulod sa ginalantawan sang streaming.

Sa pagpangusisa, na-assign suno kay Pinuela sa Regional Mobile Force Battalion ang isa pulis, samtang bag-o lang na-assign sa IPPO kag wala pa nakatapos sang  courtesy call ang isa pa ka pulis.

Na-assign naman sa Maasin ang soldado.

Ginpa-check sa supply office sa IPPO headquarters ang serial number sang mga pusil rason nga identify kun kay sin-o na-issue.