2 lalaki patay sa separado nga shooting incidents sa siyudad

By: JoMaque | Enero 20, 2020

Iloilo City – Patay ang duha ka mga lalaki nga biktima sang separado nga shooting incidents sa syudad kahapon, Enero 19.

Una nga gintiro ang 42-anyos nga call center agent nga si Alain Muller alyas Kano sa Barangay Cuartero, Jaro 12:05 P.M.

Suno sa nakakita nga si alyas Toto, nagatindog si Muller sa nagapangkay-o sapatos sa higad sang karsada sang hinali lang nagdulog ang Mitsubishi Adventure nga gray kag nagpanaug sa backseat ang duha ka mga lalaki kag gintiro ang biktima.

Gilayon nga nagpalagyo ang mga suspetsado pakadto sa Cuartero Cemetery sakay sa ila salakyan.

Gindala pa sa ospital ang biktima apang napatay suno kay Police Captain Eduardo Siacon Jr, hepe sang Jaro Police Station.

May 28 ka pilas sa ulo kag lawas ang biktima suno kay Siacon sa inisyal niya nga impormasyon.

Na-recover sa crime scene ang siyam ka basiyo sang 9 mm kag lima ka basiyo sang .45 caliber.

Las 12:30 naman sang hapon sang gintiro si Delfin Britanico samtang sakay sa iya motorsiklo sa Barangay Nabitasan, Lapaz.

Gindala man sa ospital si Britanico apang napatay bangud sang anum ka pilas sa ulo, liug kag tiyan.

Kapin 10 ka basiyo sang ginapatihan .45 caliber kag 9 mm ang na-recover sa crime scene suno sa pulis.

Sa inisyal nga impormasyon halin sa himata sang biktima, may nakabais si Britanico antes natabo ang insidente.