(UPDATE) Testigo sa pagtiro patay sa call center agent sa Jaro, nagapati nga professional killer ang mga suspek

By: Aine Grace Bravo | January 20, 2020

via Hotline

Iloilo City — Nagapati ang testigo sa pagtiro-patay kay Alain Muller, 42 anyos sa Cuartero, Jaro kahapon, Enero 19, nga professional ang mga suspek bangud lunsay ulo ang igo sang biktima.

Ginlaragway ni alyas Toto ang isa ka suspek nga manubo kag kasarangan ang panglawason, samtang daku ang ikaduha nga suspek.

Posible man suno sa iya nga apat ang sakay sang duag gray nga Mitsubishi Adventure bangud may duha pa nga yara sa passenger’s seat.

Nagatindog sa guwa sang ila balay si Muller kag nagalantaw sa nagapanahi sang sapatos sang nagdulog ang Adventure, nagpanaug ang duha ka armado nga lalaki kag gintiro ang biktima.

Madasig nga nagpaburhot ang salakyan nga wala sang plate number.

Wala sang ideya si Toto nga drug surrenderer sa ila barangay si Muller.

Wala man sang malain nga record sa barangay ang biktima bangud wala ini masyado nagaguwa sa ila balay.

Si Alain ang magulang ni Mark Muller nga gintiro-patay sang riding-in-tandem sa Taft North, Mandurriao sang Agosto 16 sang nagligad nga tuig.