2 pulis nga ginapatihan nakapalagyo sa raid sa online illegal gambling sa Janiuay, gin-relieve

By: JoMaque | Enero 21, 2020

Iloilo City (UPDATE) – Gin-relieve sang Police Regional Office 6 ang duha ka mga pulis nga ginapatihan nakapalagyo sa raid sa online illegal gambling sa Janiuay sang Enero 14.

Ginkumpirmar ni Lt. Col. Joem Malong, Spokesperson sang PRO 6, nga Enero 16 gin-implementar ang relief order sa duha ka mga pulis kag gin-assign sa Regional Personnel Holding and Accounting Unit.

Ginhingadlan naman ni Police Master Sergeant Francisco Lindero Jr., Spokesperson sang Iloilo Police Office ang mga natungdan kanday Police Staff Sergeant Noli Gallaron kag Police Corporal Ricky Setiar I.

Si Gallaron ang assign sa IPPO, samtang sa Regional Mobile Force Battalion sa Camp Tirador, Brgy. Jibolo, Janiuay si Setiar.

Sanday Gallaron kag Setiar ang tag-iya sang duha ka Gloc 9 mm pistol nga na-recover sa vault sa compound sang bulangan.

Magluwas sa ila, na-recover man sa vault ang .45 caliber ni Private 1st Class Derryl Maderse nga assign sa 12 Infantry Battalion sa Maasin.

Ang Investigation and Detective Management Division sang IPPO ang naga-imbestigar sa duha ka mga pulis.

Gin-refer naman sang IPPO sa 3rd Infantry Division sang Philippine Army ang imbestigasyon kay Maderse.

Ginadumilian ni Presidente Rodrigo Duterte ang mga pulis sa pag-engage sa gambling activities.

Ginpahayag man ni Captain Cenon Pancito III, Spokesperson sang 3rd ID, nga ginadumilian ang mga soldado nga magkadto ukon magtaya sa bulangan.

Posible ma-dismiss ang mga natungdan.

Ginatinguhaan sang Aksyon Radyo Iloilo nga makuhaan sang pahayag ang tatlo.