2 shooting incidents sa Iloilo sang Enero 19, indi konektado – ICPO Director
By: JoMaque | Enero 21, 2020
Iloilo City (UPDATE) — Indi konektado ang duha ka shooting incidents sa syudad kahapon, Enero 19, suno kay Iloilo City Police Office Director PCOL Martin Defensor Jr..
Suno kay Defensor, bisan minutos lang ang antad sang nagluntad ang mga insidente, magkatuhay ang motibo sa shooting incidents sa Barangay Cuartero, Jaro kag Barangay Nabitasan, La Paz.
Nag-surrender sa tuktok-hangyo ukon tokhang sang mga pulis ang call center agent nga si Alain Muller sang 2016, apang wala siya na-monitor nga may kaangtanan sa illegal nga druga suno kay Defensor.
Isa man sa ginasundan nga anggulo sang police ang conflict sang anay gang nga ginpamunuan ni Muller kag sa mga nabilin sang nabungkag na nga Prevendido Drug Group.
Ginpahayag nakontra sang grupo ni Muller ang Prevendido Drug Group rason gin-straffing ang ila balay sadto.
Mga 10 ka tuig na ang nakaligad sang nag-exist ang gang ni Muller, apang wala na nagpadayon.
Nagatindog si Muller sa higad sang karsada malapit sa ila balay sang nagdulog ang Mitsubishi Adventure, nagpanaug ang duha ka mga lalaki halin sa backseat kag gintiro siya.
Gindala pa sa ospital si Muller apang napatay. Sa inisyal nga impormasyon, 28 ang mga pilas sa lawas ni Muller.
Suno kay Police Captain Eduardo Siacon Jr., hepe sang Jaro Police Station, may kaakig ang mga suspetsado sa biktima bangud sang kadamuon sang iya mga pilas.
‘MAY KAAKIG MAN ANG MGA SUSPECTS’
Nagapati man si ICPO Dir. Defensor nga may kaakig ang mga suspetsado sa negosyante nga si Delfin Britanico nga gintiro-patay samtang sakay sa iya motorsiklo sa Barangay Nabitsan, La Paz.
Lunsay sa ulo, liog kag dughan ang anum ka mga pilas ni Britanico.
Suno kay Defensor, ginpabutyag sang tiyo ni Britanico nga indi malikawan sa negosyo sang biktima ang rivalry.
Si Britanico ang isa sa mga dalagku nga trucking services provider sa syudad kag may laundry shop business man siya.
Gina-imbestigaran man sang mga pulis ang ginpahayag traffic altercation antes gintiro si Britanico.
Suno sa witness, may itum nga van nga nagsugata sa motorsiklo nga ginamaneho ni Britanico.
Ginpahayag nagbais si Britanico kag ang sakay sang van tubtob nga gintiro ang biktima.
Naga-Pilipino (Tagalog) ang sakay sang van.
Halin sa service road sa Diversion Road, Mandurriao si Britanico samtang halin sa Barangay Nabitasan, La Paz naman ang itum nga van.
Wala naghatag sang opisyal statement sa police ang witness.
Nag-report man ang pamilya ni Britanico nga nakatawag pa ang biktima sa iya asawa antes siya gintiro.
Suno kay Defensor, ginpahibalo ni Britanico sa iya asawa nga may duha ka mga lalaki nga nagasunod sa iya.
Indi pa klaro kun ano ang ginasakyan sang duha ka mga lalaki kag kun ano ang ila kaangtanan sa pagtiro sa biktima.
May mga impormasyon man si Defensor nga may driver kag lalaki nga ginkastigo ni Britanico, apang gina-verify pa nila.
Ginakonsiderar sang mga pulis ang tanan nga impormasyon agud matul-id kun ano ang motibo kag makilala ang mga suspetsado sa separado nga mga kaso.