3 Chinese nationals nga nag-abot sa Kalibo, gin-quarantine bangud nakitaan sang sintomas sang bag-o nga strain sang coronavirus

By: JoMaque | Enero 21, 2020

Kalibo, Aklan – Naka-quarantine sa ospital sa Kalibo, Aklan ang tatlo ka mga Chinese nationals sang na-detect nga nagahilanat kag ginakabalak-an nga may sintomas sang bag-o nga sahi sang virus nga una naglapta sa China.

Ginhilanat ang mga foreigners nga separado nag-abot sa Kalibo International Airport kahapon, Enero 19, kag sang Byernes, Enero 17.

Ginkuhaan sang specimen ang mga pasyente kag ginpadala na sa Research Institute for Tropical Medicines para ma-usisa.

Isa sa mga pasyente ang 65-anyos nga padulong kuntani sa Boracay nga may yara sang hilanat.

Ginpakig-angutan sang Aksyon Radyo Iloilo si Dr. Cornelio Cuachon sang Aklan Provincial Health Office agud kuhaan sang pahayag, pero nagpamalibad pa siya nga magpa-interview kag gintugyan sa Department of Health Region (DOH) ang paghatag sang statement.

Gin-athag naman ni Dr. Glen Alonsabe, chief sang DOH 6 Regional Epidemiology and Surveillance Unit nga routine activity na ang pag-quarantine sa mga pasahero nga may hilanat halin sa luwas sang pungsod, ilabe na ang halin sa China, bangud sa paglapta sang bag-o nga virus sa nasambit nga pungsod.

Suno kay Alonsabe, indi lang sa Kalibo International Airport ginahimo ang hugot nga pagbantay kundi sa tanan nga paluparan sa pungsod.

Kun may ma-detect ang thermal scanner nga ginabatyag ang pasahero, gilayon siya nga gina-refer sa government hospital suno kay Alonsabe.

Ginpasiguro ni Alonsabe nga wala sang kaso sang bag-o nga virus sa Western Visayas.