Curfew for Minors Ordinance, ipatuman sa Dinagyang Festival

By: Aine Grace Bravo | January 21, 2020

via KhenJo Terco

Iloilo City — Ipatuman gihapon sang Task Force on Morals and Values Formation (TMVF) ang curfew for minors ordinance sang siyudad bisan sa highlight sang Dinagyang Festival.

Suno kay TMVF head Nestor Canong, pagpatak sang las 10 sa gab-i, masugod na sa pagpangsaway ang mga miyembro sang Task Force pati man ang iban nga force multipliers sa mga makit-an nga menor-de-edad nga naga-lagaw.

Dugang ni Canong, nahangpan niya nga kalabanan sa mga warriors ukon participants sa Dinagyang ang mga menor-de-edad nga mga estudyante. Apang paglab-ot sang las 10 suno sa iya, tapos naman ang awarding sang kompetisyon gani pwede na makapauli ang mga kabataan.

Wala sang i-exempt sa kasuguan ang TMVF, apang i-consider suno kay Canong ang mga menor-de-edad nga may kaupod nga mga ginikanan ukon guardian.

Paagi sini malikawan man ang gamo suno kay Canong bangud may mga grupo sang mga pamatan-on kon kaisa nga naga-dinumtanay kag naga-ilinaway kun magkilit-anay ilabi pa nga Dinagyang.