Former Assemblyman Buddy Britanico, nag-apelar sang bulig agud masolbar ang pagtiro patay sa iya bata nga negosyante

By: Aine Grace Bravo | January 21, 2020

via Hotline

Iloilo City — Nangin emosyonal si anay Assemblyman Buddy Britanico samtang nagapanawagan sa sin-o man nga may ihibalo sa pagpatay sa iya agot nga bata nga magguwa kag isugid ang ila nahibaluan sa mga otoridad.

Ginlaragway sang former Assemblyman ang iya anak nga si Delfin nga responsable kag wala naga-take advantage sa iban nga tawo.

Wala gid sang nahibaluan nga posible motibo ang pamilya sa pagpatay kay Delfin.

Manug-37 anyos si Delfin sa Pebrero 14. Naga-negosyo siya sang trucking kag may laundry shop.

Apat na ka tuig suno sa former assemblyman nga naga-estar sa Prime Estates sa La Paz ang iya bata upod sa iya pamilya.

Sa pagpati sang amay nga Britanico, ginhungod gid nga patyon ang iya bata bangud sa kadamuon sang iya pilas kag gintiro pa bisan natumba na.

Ginatugyan ni former assemblyman Britanico sa mga otoridad ang pagsolbar sa krimen.

Naga-motorsiklo si Delfin sang gintiro sang mga suspetsado nga sakay sa SUV sa Nabitasan, La Paz sang Enero 19 sang hapon.