Mas istrikto nga pag-check sa mga salakyan, ipatuman sang ICPO pagkatapos sang duha ka insidente sang pagpangtiro-patay sa siyudad

By: JoMaque | Enero 21, 2020

Iloilo City – Mas mangin istrikto ang Iloilo City Police Office sa pag-check sa mga salakyan pagkatapos sang asud-asud nga pagpangtiro-patay sa siyudad sang Enero 19.

Suno kay Iloilo City Police Office Director Defensor, naga-conduct na ang mga pulis sang checkpoint sa mga entry points sa syudad.

Nagapanawagan naman si Defensor sa mga motorista nga kun mahimo, buksan nila ang compartment sang ila salakyan ukon motorsiklo agud malakip sa ma-check.

Kun indi magpasugot ang mga motorista, wala sang mahimo ang mga pulis bangud ‘plain view’ lang ang ila ma-obra.

Naghingyo naman si Defensor sa city council nga kun mahimo, magpasar sila sang ordinansa nga magapahanugot sa mga pulis nga mag-check sang salakyan para sa seguridad sang tanan.

Sandig sa Section 2 sang Bill of Rights, may kinamatarong ang kada indibidwal nga mangin secure (in their persons, houses, papers , and effects) batuk sa unreasonable searches kag seizures sa bisan ano man nga katuyuan kag indi ini dapat paglapason.

‘I-DEPLOY MAS TEMPRANO’

Sa Enero 23 pa ma-activate ang Site Task Group Dinagyang apang i-deploy sang mas temprano ang mga pulis para sa Dinagyang Festival.

Suno kay Defensor, amat-amat na nga mabalik sa syudad ang mga pulis nga nag-augment sa Ati-Atihan Festival sa Kalibo, Aklan karun sa gab-i kag mahimo na sila nga ma-deploy buwas.

2,200 ka mga pulis ang i-deploy para sa Dinagyang Festival.

May 16 ka personnel screening areas nga ipahamtang antes makasulod sa mga activity areas kag judging areas.