Sa Good News: Taxi driver, nagbalik sang wallet nga may unod nga cash kag importante nga Ids sang iya pasahero

By: Aine Grace Bravo | January 21, 2020

Iloilo City — Daku ang pagpasalamat ni Mrs. Rosalie de Juan sang San Isidro, Jaro nga nabalik sa iya ang nabilin niya nga wallet sa taxi kagab-i, Enero 20.

Suno kay De Juan, nagsakay siya sa taxi sa atubang sang WVSU Medical Center pasado las 8 kagab-i.

Natalupangdan na lang ni De Juan nga wala na ang iya wallet sang yara na siya sa ila balay.

Ginpahayag naman sang taxi driver nga si Mr. Ryan Evangelista sang Ungka II, Pavia, ang pasahero niya man nga babaye ang nakakita sang wallet ni De Juan nga nabilin sa passenger’s seat.

Subong nga aga, gin-turn over ni Evangelista sa estasyon sang Aksyon Radyo ang wallet kag gintawgan ang tag-iya paagi sa nakita niya nga contact number nga nabutang sa resibo sang money remittance center.

Naga-unod ang wallet sang P10,000 nga koleksyon sa direct selling ni De Juan kag mga importante nga IDs.