28 anyos nga lalaki, patay sang ginbuno sa Sta. Barbara; abyan sang biktima, suspetsado

By: Aine Grace Bravo | January 22, 2020

via Angel Mae Ciudad

Sta. Barbara, Iloilo — Patay ang 28-anyos nga lalaki nga ginbuno sa Barangay Zone II, Poblacion, Sta. Barbara.

Ginkilala ang napatay kay Jan-Jan Lañada nga may siyam ka pilas sa nagkalain-lain nga parte sang iya lawas.

Suno kay Police Major Raymond Celoso, hepe sang Sta. Barbara Police Station, nag-inom-inom pa kagab-i si Lañada kag ang iya abyan nga si Romel Maderable nga amo ang gintudlo nagbuno sa biktima.

Gindul-ong pa ni Maderable si Lañada sa ginadayunan niya nga boarding house.

Base sa impormasyon nga nakuha sang Sta.Barbara police, may nabatian ang mga residente sa lugar nga may nagabina-isay.

Kaina sang aga, nasapwan na lang si Lañada nga patay na malapit sa iya boarding house.