Mga menor-de-edad nga nagalapas sa Curfew for Minors Ordinance nga wala sang upod nga legal nga edad sa Dinagyang Festival, i-rescue sang mga otoridad

By: JoMaque | Enero 22, 2020

Iloilo City – Hugot nga pag-monitor ang ginahimo sang Task Force on Moral and Values Formation (TFMVF) agud masiguro nga wala sang menor-de-edad nga nagalapas sa Curfew for Minors Ordinance sang Iloilo City.

Suno kay Task Force Head Nestor Canong, ipatuman nila ang Curfew for Minors Ordinance bisan sa highlight sang Dinagyang Festival 2020, base man sa direktiba ni Mayor Jerry Treñas.

Antes pa man ang highlight, halos kada gab-i sila nagalibot ilabe na sa mga eskwelahan, gym kag plazas sa diin naga-practice ang mga estudyante nga naga-intra sa highlight sang Dinagyang.

Nagpasalig si Canong nga may plano na sila upod sa Iloilo City police ilabe na sang Women and Children’s Protection Desk kag City Social Welfare and Development Office (CSWDO) agud mabantayan ang mga pamatan-on.

Gin-athag ni Canong nga ipatuman nila ang nasambit nga ordinansa agud malikawan ang pag-inaway sang mga pamatan-on nga miyembro sang mga gangs.

Sa Dinagyang highlight, dal-on ang mga ma-rescue nga menor sa Jubilee Hall kag kuhaan sang impormasyon lakip ang numero sang ila ginikanan agud mapahibalo nga na-rescue sila.

Nagpangabay naman sang kooperasyon sa Canong agud matalunsay ang paghiwat sang Dinagyang Festival.