Balay sang punong barangay sa Pototan, ginkawatan; P500,000 cash kag mga alahas, nadula

By: Aine Grace Bravo | January 23, 2020

via Angel Mae Ciudad

Pototan, Iloilo — P500,000 nga cash kag 35 mil pesos nga balor sang mga alahas ang nadula sang ginsulod sang mga kawatan ang balay ni Punong Barangay Amacio Velasco sa Barangay Cahaguichican, Pototan.

Suno Police Major Ronnie Brillo, hepe sang Pototan Police Station, las 9:45 kaina sang aga sang nakita nga bukas na ang pwertahan sang kwarto sang bata sang kapitan nga si Romel.

Sang gin-check nila ang kwarto, nakita nga wasak na ang ginabutangan sang vault, kag wala na ang vault.

Nabutang sa vault ang kwarta lakip ang gold nga sing-sing, kulintas kag pulseras.

Base sa imbestigasyon sang police, sa likod nga gate nag-agi ang mga kawatan kag ginlukit ang pwertahan para makasulod.

Indi magnubo sa tatlo ang mga suspetsado.

Padayon ang imbestigasyon sang mga pulis sa identity sang mga suspek.