Driver sang pick-up nga naka-hit-and-run patay sa 18-anyos nga lalaki sa San Dionisio, nakilala na

By: JoMaque | Enero 23, 2020

Iloilo — (Update) Nakilala na ang driver sang pick-up nga naka-hit-and-run patay sa 18-anyos nga lalaki sa Barangay Cudionan, San Dionisio sang Enero 18 sang gab-i.

Suno kay Police Captain Rene Del Castillo, hepe sang San Dionisio Police Station, may nakabati sa Aksyon Radyo sang ginpanawagan niya nga magbulig agud makilala ang driver sang pick-up.

Nagduda ang tag-iya sang pick-up nga si Patrick Alcantara sang Barangay Gildore, Sara sang nakita nga wasak ang headlight sang salakyan. Ginpahayag ni Alcantara nga si Arnold Delado sang Mabinay, Negros Oriental ang nagamaneho sang iya salakyan.

Nagpakig-angut si Alcantara sa punong barangay sang Tuble kag Cudionan, San Dionisio agud ma-istorya ang pamilya sang biktima nga si Jerson Gonzales.

Sang ginkadtuan sang San Dionisio police ang lugar nga gintaguan sang pick-up, nakita ang wasak nga headlight kag nagasantu sa salakyan ang nabilin nga debris sa lugar sa diin nabungguan ang biktima.

Sa panaysayon ni Alcantara, wala siya nakahibalo nga gingamit ni Delado ang iya salakyan. Nahibaluan niya lang ini sang ginhambalan siya sang iya tinawo nga may wasak ang salakyan nga gin-garahe.

Ginpahayag ni Alcantara nga wala na naka-communicate kag nakapakita si Delado halin sang Enero 18.

Ginabulong pa sa sa ospital ang 17-anyos nga backrider ni Gonzales.

Pasakaan sang kaso nga reckless imprudence resulting to homicide si Delado.