Anay TMTRO head Jose “Joe” Tengco, napatay sa edad nga 62

By: Aine Grace Bravo | January 28, 2020

via Hotline

Iloilo City — Napatay sa edad nga 62 si former Transportation Management and Traffic Regulation Office (TMTRO) head Engr. Jose “Joe” Tengco sang Enero 24.

Suno kay Barangay Kagawad Larry Lorenzo, bayaw ni Engr. Tengco, gintalana sa Pebrero 1 ang lubong sang anay TMTRO head, samtang ginahulat ang iya pamilya halin sa Pampanga.

Gin-schedule ang lubong pagkatapos sang las-nueve sa aga ang misa sa Arevalo Parish Church.

Ginpahayag ni Lorenzo nga sugod sang na-stroke si Engr. Tengco, anum ka tuig na ang nakaligad, nag-early retirement siya kag nagtiner na lang sa iya balay sa Sto. Domingo, Arevalo.

Suno naman sa kabulig nga si Marites, pukawon niya kuntani nga magpamahaw si Engr. Tengco sang Biernes, Enero 24, pero wala na siya nagahulag.

Nakita pa ni Marites nga nagahigda sa kuwarto kag naga-“Facebook” ang iya amo sang gab-i sang Enero 23 kag wala man siya nakamuno nga nagalain ang iya pamatyag.

May tatlo ka kabataan si Engr. Tengco, samtang na-stroke man ang iya asawa.