3 pilason sang ginlabu sang lalaki ang iya ugangan, manak kag bata sa Leon

By: JoMaque | Pebrero 5, 2020

Leon, Iloilo—Tatlo ang pilason sang ginlabu sang lalaki ang iya ugangan, bata kag manak sa Barangay Captain Fernando, Leon kahapon, Pebrero 4.

Ginkilala ang mga biktima kanday alyas City, 58-anyos;alyas Analie 21-anyos kag alyas Inday, 15-anyos.

Suspek sa paglabu sa mga biktima si alyas Joma.

Suno kay Leoney, asawa sang suspek, hubog nga nagpadulong sa ila balay si Joma.

Ginpahayag ni Leoney nga luyag sang iya bana nga magbalik sa iya apang wala siya nagpasugot rason nga may nagluntad nga pagbinaisay tubtob ginlabu sang suspek ang mga biktima.

Dugang ni Leoney nga ginlabu siya ni Joma pero nasagang niya ang kamot sang iya bana.

Napilasan sa ulo si Joma sang nakabalos naman labu ang iya ugangan.

Yara na sa kustodiya sang Leon police ang suspetsado samtang gindala sa ospital ang mga biktima.

Pursigido naman magpasaka sang kaso si Leoney sa iya bana.

Ginbulagan ni Leoney si Joma sang Hunyo sang nagligad nga tuig bangud masami siya ginasakit kun hubog ang iya bana.