2 baligyaan sa Jaro, ginsiraduhan sang City Government bangud nadakpan nga may naga-inom kag nagapanigarilyo nga mga menor-de-edad

By: Aine Grace Bravo | February 7, 2020

via KhenJo Terco

Iloilo City — Ginpasiraduhan sang City Government ang duha ka mga establisemento sa San Isidro, Jaro bangud nadakpan nga may mga menor-de-edad nga naga-inom sang makahulubog nga ilimnon kag nagapanigarilyo sang nagligad nga semana.

Pito ka menor-de-edad ang na-rescue sa 46 Store, samtang isa naman sa Cabin Store.

Suno kay Task Force on Morals and Values Formation Head Nestor Canong, magapabilin nga sirado ang duha ka mga establisemento tubtob ma-settle sang mga tag-iya ang requirements sa City Hall.

Nahibaluan man nga wala sang business permit ang mga establisemento.