Banate LGU, nagpaguwa sang advisory nga wala na sang sintomas sang nCoV ang mag-iloy nga Chinese nga gindala sa Western Visayas Sanitarium

By: Aine Grace Bravo | February 7, 2020

via Banate LGU

Banate, Iloilo — Nagpaguwa sang public advisory ang local government unit sang Banate may kaangtanan sa mag-iloy nga Chinese nga gindala sa Western Visayas Sanitarium mga las-nueve kaina sang aga.

Sa FB post sang LGU Banate, nabutang nga healthy kag wala na sang mga sintomas sang novel coronavirus pareho sang ubo, sip-on kag hilanat ang iloy kag duha niya ka bata.

Gin-refer sa Infectious Disease Holding Area sa Western Visayas Sanitarium ang mag-iloy bilang pagsunod sa national guidelines sang Department of Health (DOH).

Nagpangabay ang LGU Banate sa publiko nga indi mag-panic kag likawan ang pagpalapta sang mga indi insakto nga balita ukon magpamangkot lang sa Mayor’s Office ukon sa Rural Health Unit sang banwa.