Maestra, 3 estudyante sa Western Visayas, gina-monitor sang DepEd 6 may kaangtanan sa nCoV

By: Aine Grace Bravo | February 7, 2020

via Brian Valle

Iloilo City — Gina-monitor sang Department of Education (DepEd) 6 maestra kag tatlo ka mga estudyante sa Western Visayas bangud sa novel coronavirus.

Suno kay Dr. Melchor Kim Kwan, Medical officer sang DepEd 6, under monitoring ang bata sang maestra nga OFW sa Tigbauan nga nagpauli sang Enero 27 halin sa Singapore.

Sa report sang Department of Health (DOH) 6, ginhilanat ang OFW pagkasunod nga adlaw, Enero 28, rason nga nagpa-admit siya sa Western Visayas Medical Center kag confine tubtob subong. Ginahulat pa ang resulta sang test sa iya samples.

Gin-athag sang Tigbauan LGU nga wala sang flu-like symptoms ang iloy, pero posible gina-monitor man siya bangud siya ang nagabantay sa iya bata.

Dugang pa ni Kwan, may 14 anyos man nga high school student nga babaye, kag duha ka siyam ka tuig nga mga elementary students sa Hinigaran, Negros Occidental ang under monitoring man bangud may flight history sa Hongkong.

Gin-athag ni Dr. Kwan nga wala sang mga sintomas ang mga estudyante kag ginpaidalum sa 14-day quarantine nga kabahin sang precautionary measures sang DepEd 6.