Malay, Aklan LGU, nagdumili sa tanan nga may travel history sa China, Macau kag Hong Kong sa nakaligad nga 14 ka adlaw nga magsulod sa banwa

By: Aine Grace Bravo | February 7, 2020

via Malay LGU

Aklan — Nag-isyu si Malay Acting Mayor Frolibar S. Bautista sang Executive Order No. 04 series of 2020 nga nagasuspender sa pagsulod sa banwa sang sin-o man nga may travel history sa China, Macau, kag Hong Kong sa nakaligad nga 14 ka adlaw.

Nabutang man sa EO ang iban pa nga precautionary measures agud mabatuan ang paglapta sang novel coronavirus (2019-nCoV).

Nag-deploy sang border patrols ang Malay LGU sa mga boundaries sang banwa agud ma-check ang travel history sang mga nagasulod, ilabe na sang mga turista.

Ginlaygayan naman sang LGU ang publiko nga INDI mag-panic bangud WALA sang kumpirmado nga kaso sang 2019 n-CoV sa Malay.

Ang ginapatuman nga tikang, precautionary measure lang agud masiguro nga mapabilin nga hilway sa virus ang Malay.

Naghingyo man ang LGU sang paghangup kag kooperasyon samtang nagahimo sila sang mga tikang agud maproteheran ang Malaynon community.