Mayor Jerry Treñas, nagpangabay sa publiko nga likawan ang pagpalapta sang sala nga impormasyon

By: JoMaque | Pebrero 8, 2020

Iloilo City — Nagpangabay si Mayor Jerry Treñas sa publiko nga mag-aligmat kag siguraduhon nga i-check ang husto nga mga news sources antes magpalapta sang mga balita agud malikawan ang panic.

Kasunod ini sang naglapta nga mensahe sa social media ilabe na sa Facebook nga infected sang 2019 novel coronavirus (2019-nCoV) ang mga empleyado kag manager sang Unitop General Merchandise sa siyudad.

Gin-athag sang alkalde nga wala sang kamatuoran ang amo nga impormasyon kag wala ini naghalin sa city hall.

Sa subong nga tyempo suno sa iya, importante nga magpati lang sa mga official statement halin sa Mayor’s Office, Public Information Office ukon halin kay Dr. Roland Fortuna, ang focal person para sa novel coronavirus.

Nagpaathag na ang Unitop management paagi sa ila ginpaguwa nga official statement nga wala sila sang mga empleyado nga infected sang nCoV.