Bangkay sang babaye, nasapwan sa tamburong sa Lambunao

By: AIne Grace Bravo | via Farrah Mae Morano

LAMBUNAO, Ilo., Feb. 17, 2020 — Ginkumpirmar sang police nga babaye ang bangkay nga nasapwan sa Brgy. Tranghawan, Lambunao las-8:40 kaina sang aga.

Suno kay PSSg Marvin Sison, imbestigador sang Lambunao MPS, ginbanta sa 40s ang edad sang babaye nga wala pa ma-identity bangud yara na sa advance state of decomposition.

Natukiban ang bangkay sang naglabay nga lalaki nga may hangover. Nakita sang lalaki ang bangkay sa masiut nga porsyon, sa sulod sang tamburong.

Ginabanta nga masobra tatlo ka adlaw na ukon isa ka semana ang bangkay sa tamburong, suno kay PSSg Sison.

Ma-request pa ang Lambunao police sang autopsy para mabal-an ang rason sang pagkapatay sang babaye.

Na-recover sa lugar ang blue-gray nga shorts. Indi naman ma-establisar sang mga otoridad ang color sang t-shirt nga suksok sang bangkay.

Suno kay PSSg Sison, wala sang may nagpa-blotter sa police station nga may naduklaan sang himata sa Lambunao.

Base naman sa informant sang Aksyon Radyo Iloilo, may napanimahuan sila sang Biernes sa amo nga lugar.