Lalaki sa Alimodian, nabiktima sang accidental firing suno sa iya pamilya

By: Aine Grace Bravo | via Aksyon Night Patrol

ALIMODIAN, Ilo., Feb. 18, 2020 — Patay ang 22-anyos nga lalaki nga may igo sang bala sang pusil sang nasapwan sa Barangay Ingwan, Alimodian pasado las-nueve kagab-i, Pebrero 17.

Gindala sa Aleosan District Hospital si Regemel Torre sang amo man nga lugar nga may pilas sa tuo nga parte sang iya lawas, pero gindeklarar siya nga dead-on-arrival.

Suno kay PLT Danilo Noca, hepe sang Alimodian Police Station, base sa ila pag-imbestigar, naglupok ang homemade nga pusil ni Torre sang natumba siya, kag naigo siya sa lawas.

Upod pa ni Torre ang iya amay kag pakaisa nga nag-inom, pero nag-una siya pauli.

Nakabati na lang ang amay kag pakaisa ni Torre nga may naglupok kag sang ila ginkadtuan, nakita nga duguon ang lalaki.

Nagapati ang pamilya nga aksidente ang natabu kag wala sang foul play sa pagkapatay ni Torre.