Babaye nga bangkay na sang nasapwan sa Lambunao, may deperensya sa paminsaron base sa imbestigasyon sang police

By: JoMaque | Pebrero 19, 2020

Iloilo — (UPDATE) Base ini sa pag-follow-up ni PSSg Marvin Sison, imbestigador sang Lambunao MPS.

Nagpadulong si PSSg Sison sa Brgy. Daanbanwa, Lambunao kaina sang aga kasunod sang impormasyon nga may babaye nga may deperensya sa paminsaron nga pirme nagapa-amulya sa amo nga lugar.

Ginkumpirmar sang residente sang Barangay Daanbanwa nga si Mrs. Elizabeth Amistoso nga siya ang naghatag sang shorts nga nasapwan malapit sa bangkay sang babaye.

Suno ka Mrs. Amistoso, Pebrero 7 sang nagkadto sa ila barangay ang babaye, kag ginpakaun pa niya. Sang amo nga tiun suno kay Amistoso, naga-ubo kag nagahilanat ang babaye gani ginhatagan niya sang bulong kag jacket kag ginpatulog. Pero naglakat sang gab-i ang babaye kag wala na nakabalik sa Daanbanwa.

Gina-imbestigaran na sang Lambunao police ang identity sang babaye nga ginabanta ara sa 40s ang edad. Naga-Hiligaynon ang babaye suno kay Mrs. Amistoso.

Nagapanawagan si Sison kun sin-o ang nadulaan sang miembro sang pamilya nga makig-angut sa Lambunao police agud ma-identify ang napatay.

Ginpalubong sang police ang bangkay bangud ara na sa advance state of decomposition.