Pulis, ginreklamo nga nagpalupok sang pusil sa Sta. Barbara

By: Aine Grace Bravo | via BBB

STA. BARBARA, Ilo., Feb. 21, 2020 — Ginreklamo ni punong barangay Roy Quilarto sang Ilaya II, Balibagan Oeste, Sta. Barbara nga nagpalupok sang pusil ang pangayaw nga pulis sang Pebrero 16 sang gab-i.

Ginkilala ni Police Executive Master Sergeant Albert Sogo-an sang Sta. Barbara Police Station ang pulis kay Police Corporal Rolando Lozada Jr sang Zamora Melliza, City Proper kag assigned sa Iloilo City Mobile Group.

Suno naman kay Police Staff Sergeant John Sabio sang Sta. Barbara Police Station, halin sa balay sang iya nobya sa Brgy Nasugban si Corporal Lozada kag upod niya nga nag-inom inom ang duha ka abyan.

Ginpahayag ni Sabio nga nagpalupok sang pusil si Lozada bangud may nagasunod nga duha ka lalaki sa iya base man sa panaysayon sang iya nobya.

Sa pagpati nga may himuon sang malain ang mga nagasunod sa iya, nagpalupok sang pusil ang pulis.

Natukiban sang Sta. Barbara police nga indi lang makaisa kundi makapito ka beses nga nagpalupok sang pusil si Lozada base naman sa duha ka testigo.

Gin-refer na sang Sta. Barbara Police Station ang kaso sa Provincial Internal Affairs Service (PIAS).