49 Filipinos nga gin-quarantine kasunod sang pag-abot halin sa Wuhan, China, negatibo sa COVID-19 kag ginpasugtan na nga makapauli

By: Aine Grace Bravo | via CNN PH

TARLAC, Feb. 22, 2020 — Ginhatagan na sang certification of quarantine completion ang mga Filipinos nga gin-evacuate halin sa Wuhan, China nga sentro sang coronavirus disease outbreak, kasunod sang ila 14 ka adlaw nga pagpa-quarantine sa New Clark City sa Capas, Tarlac.

Naghiwat sang send-off ceremony ang Department of Health upod sa Department of Foreign Affairs para sa tanan nga repatriates nga gin-quarantine kaina sang hapon antes sila ginpasugtan nga makapauli sa ila tagsa ka lugar.

49 ang nakakumpleto sang quarantine period nga ginabug-usan sang 30 ka Overseas Filipinos, lima ka DOH medical team members, lima ka DFA response team members, anum ka plane crew kag tatlo ka ground personnel.

Suno kay Health Secretary Francisco Duque III, negatibo sa COVID-19 ang mga repatriates. Nagbun-ag naman sang healthy baby boy ang isa sa mga repatriates.

Magluwas sa certification of quarantine completion halin sa DOH, nakabaton man ang mga repatriates sang financial assistance halin sa DFA, Overseas Workers Welfare Administration kag Department of Social Welfare and Development.

Ginpasalamatan sang DOH ang DFA, OWWA, Bases Conversion and Development Authority, PNP, Bureau of Quarantine, Central Luzon Center for Health Development, Local Government Unit sang Capas, kag mga DOH hospitals.