Taxi driver, nagreklamo nga gintampa kag ginpahug patyon sang nagpakilala retired police officer sa Jaro; ginareklamo, nanginwala sa akusasyon

By: Aine Grace Bravo | via KhenJo Terco

ILOILO CITY, Feb. 22, 2020 — Nagreklamo ang taxi driver nga ginpahug siya sang nagpakilala retired nga pulis sa Balabago Jaro, kaina sang aga, Pebrero 22.

Suno kay alias Mark, 26 anyos, halin siya sa ila opisina kag padulong sa nagapang-car wash sang natabu ang insidente.

Nag-left turn siya sa intersection sang Balabago kag Cubay, Jaro sang may nagapadulong man nga pick-up nga ginasakyan sang ginareklamo.

May nabatian nga singgit si Mark, apang wala niya ini ginsapak.

Nakibot si Mark sang may nagpangita sa iya kag gintampa siya sang lalaki nga driver sang pick-up.

Ginpangita suno sa iya sang lalaki ang iya lisensya kag ginkuhaan sang litrato. Nagpakilala nga pulis ang lalaki kag nagpamahug suno kay Mark nga patyon siya samtang may ginatuyo nga gabuton sa iya kilid.

Ginpunggan naman sang mga kaupod nga taxi driver ni Mark ang lalaki nga nagawaras tubtob nga naghalin.

Ginpakamaayo na lang ni Mark nga indi magbiyahe sa kakulba nga may matabo sa iya.

‘INDI TUOD’

Nanindugan naman ang ginareklamo nga wala niya ginpahug si Mark.

Suno kay retired police officer Rico Espolong, nadala siya sang iya balatyagon rason nga nahana-an niya nga hampakon ang driver, apang iya gin-athag nga wala naigo ang driver.

Indi man matuod suno sa iya ang reklamo sang driver nga ginpahug siya nga patyon.

Nagpa-athag si Espolong nga nang-agaw sang linya ang taxi driver sang nagsugat-anay sila sa intersection sang Cubay kag Balabago, Jaro. Nakahingagaw lang sa pagpreno ang ginareklamo rason nga wala sila nagbungguanay.

Desidido si Espolong nga i-report sa LTO ang natabo sa ila sang taxi driver.