20 anyos nga nagabusong nga babaye, ginbuno sang iya anay live-in partner sa Leganes

By: Aine Grace Bravo | via Farrah Mae Morano

LEGANES, Ilo., Feb. 25, 2020 — Pilason ang 20 anyos nga babaye sang ginbuno sang iya anay live-in partner sa Leganes Plaza kaina sang hapon.

Ginabulong na sa ospital sa syudad si alyas Inday, samtang preso si alyas Toto, 30 anyos, sa Leganes Police Station.

Suno kay PSSg Jucilo Jimenez, imbestigador sang Leganes Police Station, masubra isa na ka bulan nga nagbulagay ang suspek kag biktima.

Base sa imbestigasyon, gin-text ni Inday si Toto nga makitaay sila sa plaza sang Leganes agud mabalik sang lalaki ang iya nga mga ID’s. Pero sang nagkitaay sila, gulpi gin-agaw ni Toto ang cellphone ni Inday kag ginlampos, gintampa sa wala nga guya ang babaye kag ginbuno sa tiyan gamit ang bread knife.

Nagpalagyo si Toto pero nalagas kag nadakpan sang mga pulis. Na-recover sa iya ang kutsilyo nga gingamit sa pagbuno.

Ginpahayag naman ni Toto nga na-impito siya bangud nadakpan nga may iban nga lalaki si Inday bisan sang updanay pa sila sang una.

Nahibaluan nga nagabusong sang apat ka bulan si Inday kag suno kay Toto, wala siya nagapati nga siya ang amay sang bata. Tatlo ka tuig nga nag-updanay ang duha antes nagbulagay, kag may sila duha ka kabataan.

Naghinulsol naman si Toto sa iya nga ginhimo kag nagpabutyag nga indi niya hungod ang natabo. Nagapangayo man si Toto sang pasaylo sa iya nga ginhimo.