Numero sang mga Filipinos sakay sa Diamond Princess cruise ship sa Japan nga positibo sa COVID-19, naglab-ut na sa 80

By: Aine Grace Bravo | via DZRH

JAPAN, Feb. 25, 2020 — 80 na ka Filipinos nga sakay sang Diamond Princess cruise ship sa Japan ang nagpositibo sa coronavirus disease, suno kay Health Secretary Francisco Duque III.

Suno sa tiglikum, isolated ang mga pasyente kag padayon nga ginabulong sa mga ospital sa Japan.

Sa separado naman nga pahayag, ginkumpirmar ni Foreign Affairs Undersecretary Brigido Dulay nga 10 sa mga na-infect ang naka-recover kag na-discharge na sa ospital.

Samtang negatibo sa coronavirus ang masobra pa 400 ka mga Pinoy nga sakay sang barko nga ginpasugtan na nga makapanaug. Duha ka chartered planes ang nagsugat sa mga Pinoy nga ginalauman maga-abot sa pungsod subong nga gab-i.

Sa ila pag-abot, iga-quarantine ang mga repatriates sang 14 ka adlaw sa New Clark City sa Capas, Tarlac.