Konduktor sang bus, gintiro sa Culasi, Antique

By: JoMaque | Pebrero 27, 2020

Antique – Pilason ang konduktor sang Ceres bus nga gintiro sa Culasi, Antique kahapon sang aga, Pebrero 26.

May pilas sa tuo nga guya kag likod si El Boy Zamora, 24 anyos nga tumandok sang Negros Occidental.

Suno kay PCPT Bryan Alamo, hepe sang Culasi MPS, nagahulat sang ila biyahe si Zamora sang ginpalapitan sang suspek kag gintiro.

Una nga gindala sa ospital sa Culasi si Zamora, pero ginsaylo sa ospital sa San Jose, Antique agud ma-operahan kag makuha ang bala sa iya likod.

Na-identify naman ang suspek suno kay PCPT Alamo, kag personal nga hiligut-anon ang ginasunod nga motibo base man sa pahayag sang biktima.

Dugang ni Alamo, padayon sila nga nagatipon sang dugang nga mga ebidensya agud mapasakaan sang kaso ang suspek nga at-large.

Duha ka empty shells sang caliber 45 ang na-recover sa crime scene, suno sa hepe.