Mga hotels sa Iloilo City, ginhatagan sang giya sang City Health Office sa pagbaton sang guests sa tunga sang pamahug sang COVID-19

By: Aine Grace Bravo | via Hotline

ILOILO CITY, Feb. 27, 2020 — May giya ang mga hotels kun ano ang himuon kun may mga guests nga naghalin sa mga pungsod nga infected sang coronavirus disease.

Suno kay Dr. Roland Fortuna, focal person sang Iloilo City sa COVID-19, ginhatagan nila sang kopya sang interim guidelines sang Department of Health ang mga hotels agud mangin giya sa pag-disinfect sang establisemento nga gintineran sang mga foreigners.

Ginasapol man sang City Health Office ang mga miembro sang Iloilo Hotels, Restaurants and Resorts Association (IHRRA) kag ginhaylo nga i-request sa foreig guests nga mag-fill up sang form may kaangtanan sa ila travel history kag present health conditions.

Ginpanugyanan man ang mga management nga magpahibalo gilayon sa CHO kun may guest nga makitaan sang mga sintomas sang posible COVID-19.

Gin-athag ni Fortuna nga indi ini mandatory, pero mas maayo kun ipatuman sang mga hotels para man sa kaayuhan sang ila mga guests.