PECO, nagapanindugan nga unconstitutional ang expropriation sa ila mga assets

By: Aine Grace Bravo | via Hotline

ILOILO CITY, Feb. 28, 2020 — Ginpanindugan sang abogado sang Panay Electric Company (PECO) nga unconstitutional ang expropriation sa ila mga assets, base sa desisyon sang Mandaluyong RTC Branch 209.

Sa nasambit nga desisyon ni Hon. Judge Monique A. Quisumbing-Ignacio  nga ginpaguwa sang Hulyo 1, 2019 nga nagadeklarar sang Sections 10 kag 17 sang Republic Act 11212 nga void kag unconstitutional.

Ang Sec. 10 amo naga-unod sang pag-otorisar sa MORE Electric and Power Corporation nga maka-exercise sang eminent domain, nga nagakahulugan sang pag-expropriate sa naga-egsister nga assets sang PECO.

Ang Section 17, nagapahanugot sa PECO nga mag-operate sa transition period nga indi magsobra sa duha ka tuig.

Suno kay Atty. Estrella Elamparo, legal counsel sang PECO, tubtob subong, wala gihapon sang desisyon ang Korte Suprema sa apelasyon sang MORE sa nangin deklarasyon sang Mandaluyong RTC.

Nagahingyu sila suno sa iya sa Iloilo RTC nga hulaton anay  ang desisyon sang Korte Suprema may kaangtanan sa isyu sang constitutionality agud malikawan ang kumplikasyon.