Iloy nga taga-Capiz nga nagpangayo sang bulig sa Aksyon Radyo Iloilo para mabulong ang iya bata nga indi makakita, daku ang pagpasalamat bangud na-operahan na kag nakakita ang iya bata

By: JoMaque | Pebrero 29, 2020

Iloilo — Iloilo City –Nagpasalamat ang iloy nga taga-Capiz sa bulig pinansyal nga ginpaagi sa Aksyon Radyo Iloilo kasunod sang madinalag-un nga operasyon agud liwat makakita ang iya nabulag nga bata.

Suno kay Mrs. Jema Edaño sang Dao, Capiz, gin-operahan na ang iya nga 12-anyos bata sang Pebrero 14 sa Iloilo Doctor’s Hospital.

Sa subong, mas mahapos na ang paghulag sang iya nga bata bangud makakita na sang maayo. Naga-enjoy naman suno kay Edaño sa paghampang ang bata.

Suno kay Edaño, halos katunga gid sang balayran sa operasyon ang nabaton nga bulig pinansyal.

Disyembre 20 sang nagligad nga tuig sang nagsaka sa Aksyon Radyo Iloilo ang mag-iloy agud magpanawagan sang bulig.

Si traffic aide Alex Adaniel ang nagdala sa mag-iloy sa estasyunan sang nakita ang bata nga nagahilibi-un sa kilid sang karsada malapit sa idalum sang Infante flyover gani iya gin-usisa kag nahibaluan ang sitwasyon sang bata.

Ginsaysay sadto ni Mrs. Edaño nga naubos na ang ila kwarta sa plete kag reseta sang iya bata gani nagdangup sila sa Aksyon Radyo.

Naga-isahanon na lang ang iloy sa pagsagod sa iya kabataan bangud nabalo na siya.