MORE Power, nagpasalig nga kapable sila sa pag-operate sang substations sang PECO; PECO, nanindugan nga kontrolado nila ang operasyon
By: JoMaque | Pebrero 29, 2020
Iloilo City — Kapable ang mga tinawo sang MORE Electric and Power Corporation sa pag-uyat sang mga substations sang Panay Electric Company.
Ginpasiguro ni MORE Power Project Development and Management head Engr. Rey Jaleco, nga konektado sang una sa Napocor kag National Transmission Corporation, nga may technical capability ang ila mga empleyado agud mag-operate sang substation gani wala sang kabalak-an ang mga konsumedor sa ila pag-take over sa PECO.
Ginserbe kaina sang hapon sa PECO ang kopya sang writ of possession nga gin-isyu ni RTC Branch 23 Hon. Judge Emerald K. Requina-Contreras.
Ginkumpirmar ni Atty. Hector Teodosio, isa sa mga abogado sang MORE Power, nga na-take over na nila ang mga assets nga nasaad sa mandu. Naserbe suno sa iya ang kopya sang mandu sa substation sa Baldoza, La Paz; General Luna, City Proper; Tabuc Suba, Jaro; kag Bolilao, Mandurriao.
Wala naman naserbe sang mga sheriff ang mandu sa substation sa Avanceña Street, Molo bangud “gab-i na kag may barikada ang substation sang PECO sa Molo.”
“WE ARE IN FULL CONTROL”
Ginapanindugan naman ni Atty. Guillermo “Boy” Alcantara, isa sa mga abogado sang PECO, nga ang iya gihapon kliyente ang naga-operate.
Ini base suno sa abogado sa addendum sa writ of possession nga gin-isyu si Judge Requina-Contreras. Sa No. 4 item, nakabutang nga dapat i-mentinar ang status quo sang operasyon, “so as to give time for MORE to orient/train/immerse their personnel, before they fully take control of the operation.”
Base naman suno kay Atty. Alcantara sa ila nahisugtan sa taga-MORE, pwede makabutang sang tinawo ang MORE sa mga substations, pero maka-obserbar lang sila kag indi makatandog sa operasyon.
Ginpabutyag man ni Alcantara nga gina-contest pa nila sa korte ang pag-take over sang MORE kag samtang wala pa ma-define sang maathag ang mga bagay-bagay, ang PECO ang may “full control” sa operasyon.