Pagkaon sang isda halin sa Iloilo River, indi safe — EMB 6

By: JoMaque | Pebrero 29, 2020

Iloilo City — Indi ‘safe’ ang pagkaon sang isda halin sa Iloilo River suno sa Environmental Management Bureau sang Department of Environment and Natural Resources 6.

Suno kay Engr. Bonifacio Enorme Jr, Water Quality Management Area focal person sang EMB 6, may mga balatian nga mahimo mabatyagan ang makakaun sang isda halin sa Iloilo River.

Sa pinakaulihi nga physiochemical analysis sang EMB 6 sa Iloilo River, nadiskubrehan nga tuman ka taas ang fecal coliform count sa Iloilo River.

Naglab-ot sa 26,162 ang average nga fecal coliform sa Iloilo River kada 100 ml sang 2019, tuman ka taas ipa-anggid sa standard nga 200 kada 100 ml base sa DENR Administrative Order No. 2016-08.

Sa pagtuon sang Water Research Center, lakip sa mga balatian nga mahimo makuha bangud sa mataas nga fecal coliform ang hepatitis kag gastroenteritis.