Abogado sang PECO, may nakita nga mga iregularidad sa pag-issue sang Writ of Possession sang mga assets sang PECO

By: JoMaque | Marso 2, 2020

Iloilo City — May nakita nga iregularidad ang Panay Electric Company sa gin-isyu nga Writ of Possession ni Iloilo RTC Branch Judge Emerald Requina-Contreras sa MORE Electric and Power Corporation sa pila ka assets sang PECO.

Ini ang ginpabutyag ni Atty. Estrella Elamparo, isa sa mga abogado sang PECO kasunod sang pag-implementar sang mandu sang Pebrero 28.

Suno kay Elamparo, ma-file sila subong nga adlaw sang Motion for Inhibition batuk kay Judge Contreras sa Expropriation case sang MORE kag PECO.

Ginpahayag ni Elamparo nga sang nabaton nila ang impormasyon nga gin-grant ni Contreras ang Writ of Possession sang MORE sang Pebrero 27, gilayon sila nag-file sang motion agud athagon ang mga parametro nga sakop sang mandu.

Gin-follow up pa sang PECO ang korte sang Pebrero 28 sang aga pero nagbalibad nga maghatag sang anuman nga impormasyon ang clerk of court. 

Pebrero 28 sang hapon, nag-abot ang sheriff, mga police kag mga abogado sang MORE agud mag-implementar sang mandu sang korte.   

Una na nag-file ang mga abogado sang PECO sang Petition for Certiorari sa Court of Appeals Visayas nga nagahingyo sang temporaryo restraining order (TRO) agud indi mapadayon ang pag-implementar sang Writ of Possession.