Lalaki, nasapwan patay sa Dumangas

By: JoMaque | Marso 2, 2020

Dumangas, Iloilo— Nasapwan patay ang 57-anyos nga lalaki sa Barangay Calao, 10:30 kahapon sang aga, Marso 1.

Ginkilala ang lalaki kay Emmanuel Ebonia sang nasambit man nga barangay.

Suno sa asawa sang lalaki nga si Mary Jean, naglisensya pa ang iya bana las 10 kagab-i nga malagaw sa iya kilala apang natingala siya nga tubtob kaina sang aga, wala nakapauli ang iya bana.

Nakit-an sang trisikad driver ang lalaki nga nagakulob sa higad sang dalan.

Suno kay PMSgt. Ronald Domines sang Dumangas Police Station, wala sang nakita nga pilas ukon patimaan nga hungod nga ginpatay si Ebonia.

Posible suno sa pulis nga nakamumo ang lalaki bangud sang tuman nga kahulugbon.

Wala man sang mga nagkaladula sa gamit sang lalaki.