PECO, nanindugan nga sa ila dapat magbayad sang bill ang mga konsumedor

By: Aine Grace Bravo | via Hotline

ILOILO CITY, March 2, 2020 — Nagapanindugan ang Panay Electric Company nga sa ila dapat magbayad sang bill ang mga kunsumedor.

Sa tunga ini sang palamangkutanon subong sang mga kunsumedor kun diin sila mabayad kasunod sang pagserbe sang kopya sang writ of possession sa PECO kag pag-take over sang MORE Electric and Power Corporation sa ila pila ka mga assets.

Ginpa-athag ni Mr. Mikel Afzelius, Corporate Communications Officer sang PECO, nga sila ang naga-issue sang bill sa mga kunsumedor bangud sila ang may kontrata sa mga power suppliers.

Major supplier sang PECO ang Global Business Power Corporation kag sila ang may approved rates sa Energy Regulatory Commission.

Sa ulihi nga pagpangusisa sang PECO suno kay Afzelius, wala sang kontrata ang MORE sa GBPC. Ginpahayag ni Afzelius nga dapat i-honor sang mga kunsumedor ang notice halin sa PECO para makabayad man ang kompaniya sa GBPC.

Una na ginpahayag sang MORE nga sugod subong nga adlaw, magasugod naman sila sa pag-transact sa mga kunsumedor.

Ginpahayag naman ni Afzelius nga kun magbayad sa MORE ang kunsumedor, posible nga utdan nila ini sang supply.