PLt. Colonel Jovie Espenido, ipaidalum sa summary hearing bangud sa paglapas sa gag order sang PNP Chief — PRO 6 Director Rene Pamuspusan

By: JoMaque | Marso 3, 2020

Iloilo City — May probable cause nga nakita sa imbestigasyon sang Police Regional Office 6 kay PLTCOL Jovie Espenido sa paglapas niya sa gag order ni PNP chief Archie Francisco Gamboa.

Ini suno kay PRO6 Director Rene Pamuspusan sa inisyal nga appreciation sang imbestigador sa Regional Investigation and Detective Management Division.

Kasunod sini, ipaidalum sa summary hearing si Espenido.

Ginmanduan ni Gamboa ang 357 ka mga pulis nga ginsapol niya nga indi maghatag sang pahayag samtang nagapadayon ang ila imbestigasyon.

Ang ginpatawag nga mga pulis, lakip kay Espenido, ang gina-imbestigaran bangud nalakip sa druglist ni Presidente Rodrigo Duterte.

PARA SA DIGNIDAD

Nagdepensa naman si Espenido nga naghatag siya sang statement sa media para sa iya dignidad.

Ginpasumiter na ni Pamuspusan sang explanation si Espenido natuhoy sa paglapas niya sa gag order ni Gamboa.

Ang explanation ni Espenido ang gin-refer ni Pamuspusan sa RIDMD.

Assign si Espenido sa Regional Personnel Holding and Accounting Unit.

Si Espenido ang anay Deputy City Director for Operation kag Chief sang City Drug Enforcement Unit sa Bacolod City Police Office.