Lalaki nga natiruhan sa Democracia Jaro, napatay sa ospital

By: JoMaque | Marso 7, 2020

Jaro, Iloilo City – Napatay sa ospital ang lalaki nga natiruhan sa Democracia, Jaro Marso 5 sang gab-i.

Ini ang ginkumpirmar ni Police Captain Eduardo Siacon Jr., hepe sang Jaro Police Station.

Ginkilala ni Siacon ang biktima kay Angel Lademora sang Camiri, San Enrique nga naga-board lang sa Democracia.

May patal nga pilas sa agtang ang biktima nga posible gintunaan sang iya kamatayon.

Base sa initial nga imbestigasyon sang Jaro police, nagapasulod sa Democracia, Jaro kag pauli sa ila boarding house si Lademora sang gintiro sang riding-in-tandem suspects.

Nagpalagyo suno kay Siacon sa direksyon sang Sta. Isabel, Jaro ang mga suspek kag nagliko pa-Jaro Plaza.

Apat ka empty shells kag isa ka deformed slug sang pusil ang na-recover sa crime scene.

Una na ginpahayag ni Alyas Mak-Mak, residente sa lugar, nga apat ka lupok ang ila nabatian antes nakit-an nga duguon si Lademora.

Suno naman kay Alyas Nonoy, masami nagakaon sa karinderya ang biktima kag nagapakilala nga konektado siya sa National Bureau of Investigation (NBI).

Gina-imbestigaran pa sang Jaro police ang tanan nga anggulo sa krimen.