1 patay, 2 pilason sa pagbungguanay sang pick-up kag motorsiklo sa Ajuy

By: JoMaque | Marso 7, 2020

Ajuy, Iloilo— Patay ang 54 anyos nga lalaki sang nakabunggo ang iya ginamaneho nga motorsiklo sa kasugata nga pick-up sa Barangay Tipacla, Ajuy las 7:55 kaina sang aga.

Napatay bangud sang pilas sa ulo kag lawas si Willy Diocos sang barangay Tagubanjan, Ajuy. Ginhingagaw pa dala sa ospital si Diocos apang wala gid natabangan.

Pilason naman ang mga angkas ni Diocos nga sanday Josan Nicos, 19 anyos kag Eloisa Mae Ancuna 21 anyos nga ginpangdala sa Sara District Hospital.

Padulong sa Poblacion, Ajuy sanday Diocos sang nakabunggo sa kasugata nga pick-up nga ginamaneho ni Jeonil Sarino, 41 anyos sang Central, Ajuy.

Preso na si Sarino sa Ajuy, MPS.