Lalaki nga naka-posas kag nakita sa atop sang Mandurriao Public Market, nakapalagyo halin sa opisina sang CIDG Field Unit; Lalaki, may kaso nga rape

By: JoMaque | Marso 7, 2020

Iloilo City— (UPDATE) Nakapalagyo halin sa CIDG Iloilo City field unit office sa Mandurriao ang lalaki nga may kaso nga 3 counts sang rape kagab-i.

Ginkumpirmar ni Major James Dogao, head sang CIDG field unit sa Mandurriao nga nakapalagyo si Aldren Balintong, 40 anyo sang Cadagmayan Norte, Sta. Barbara. Nagreklamo suno kay Dogao si Balintong nga nagasakit ang tiyan rason nga ginpasugtan sang CIDG personnel nga mag-CR.

Nag-agi sa bintana sang CR si Balintong kag naglumpat sa atop sang Mandurriao Public Market.

Nakaposas pa ang lalaki sang nakapalagyo kag gintabon niya lang ang iya bayo sa iya kamot.

Ginlagas pa sang mga taga-CIDG si Balintong apang wala naabtan.

Mga las 6 kagab-i, may nakita nga lalaki nga wala sang suksok nga t-shirt ang mga vendor sa Mandurriao Public Market nga naglumpat halin sa atop sang merkado.

May tabon nga t-shirt ang kamot sang lalaki nga nakita sang mga vendors kag nagdali-dali sakay sa tricycle pakadto sa direksyon sang Calajunan, Mandurriao.