Code Red Sub-Level 1, gindeklarar sang DOH bangud sa pamahog sang COVID-19

By: JoMaque | Marso 8, 2020

Gindeklarar sang Department of Health ang code red sub-level 1 bangud sa pamahog sang coronavirus disease (COVID-19) sa pungsod.

Sa press statement, ginkumpirmar ni Health Secretary Francisco Duque III nga ang ikalima nga kaso sang virus sa pungsod ang una man nga kaso sang local transmission matapos na-verify sa Bureau of Immigration nga wala siya sang travel history.

Ang 62-anyos nga Filipino nga COVID-19 infected patient ang regular nga nagabisita sa Muslim prayer hall sa Barangay Greenhills, San Juan City suno kay Secretary Duque sa press conference kahapon, Marso 6.

Ang 59-anyos naman nga asawa sang 62-anyos nga pasyente ang ginkumpirmar sang DOH nga ikaanum nga confirmed COVID-19 case.

Gin-rekomendar sang DOH kay Presidente Rodrigo Duterte ang State of Public Health Emergency kasunod sang pagdeklarar sang code red sub-level 1.

Ginpaathag ni Duque nga ang Code Red alert preventive measure nga maga-mandate sa mga government kag health care providers nga mag-preparar para sa posible increase sang COVID-19 cases.