Tigulang nga una gin-report pilit ginpasakay sa salakyan sa Progreso, Lapuz, nadakpan sa illegal gambling kag yara na sa La Paz Police Station

By: JoMaque | Marso 8, 2020

Iloilo City  — Yara na sa kustodiya sang La Paz Police Station ang 66-anyos nga lalaki, nga una gin-report pilit ginpasakay sa salakyan nga Nissan color gray sa Progreso, Lapuz kahapon, Marso 7.

Suno kay Police Corporal Marell Tamayo, sang La Paz Police Station, las 5:00 sang hapon gin-turn over sa ila station si Ramon Salarda bangud sa illegal gambling.

Una gin-alegar sang 61 anyos nga babaye nga nakakakita sa insidente nga gindulugan sang salakyan si Salarda kag pilit nga ginpasakay sang duha ka lalaki mga La-1:30 sang hapon.

Wala nagpundo ang salakyan nga gray sang ginparahan ni Punong Barangay Barangay Myde Sollano.

LEGITIMATE OPERATION

Nagpanindugan si Iloilo City Police Office Director Police Colonel Erick Dampal nga police operation ukon anti-illegal gambling operation ang ila ginhimo sa Progreso, Lapuz.

Suno kay Colonel Dampal, nadakpan sang mga pulis sa akto si Salarda nga nagapataya sang bookies.

Wala naman sang direkta nga sabat si Dampal sa ginhambal ni Punong Barangay Sollano nga wala nagpondo ang salakyan nga gray sang ginpaparahan sang kapitan.

Suno naman kay Salarda wala siya nagapataya sang bookies kundi ginlihog lang siya sang iya kumpare nga kuhaon ang pataya sang bookies.

Nagapanindugan man si Salarda nga wala siya sang cotejo nga dala sang ginkuha.