Moving-up activities sa Day Care sang Iloilo City, indi madayon bangud sa COVID-19

By: JoMaque | Marso 9, 2020

Iloilo City — Ginpa-iway ni Iloilo City Mayor Jerry Treñas ang moving-up activities sang Day Care sa siyudad. 

Kasunod ini sang pagdeklarar sang Department of Health sang Code Red, Sublevel 1 bangud sa coronavirus disease.

Sa iya ginpadala nga mensahe sa mga katapo sang media, ginpahibalo sang alkalde nga i-release na lang sang mga Day Care teachers sa mga ginikanan ang tanan nga certificates sang ila kabataan imbes nga maghiwat sang moving-up ceremonies.

 Ginmanduan man ni Treñas si Dr. Roland Fortuna, focal person sa COVID-19 sang City Health office nga mag-conduct sang mga conferences may kaangtanan sa nanuhay-tuhay nga cleaning procedures kag medical protocols para sa city hall, mga merkado, eskuwelahan, hotels, health centers, transport terminals, simbahan kag mga establisemento komersyal.

Ginpasalig sang alkalde nga tinguhaan sang Iloilo city government nga mangin safe ang tanan sa virus. 

Nagpangabay man si Treñas sang kooperasyon sang mga pumuluyo sa tunga sang pamahog sang COVID-19 sa siyudad.