Concepcion, Iloilo Mayor Raul Banias, ginsuhestyun ang pag-lockdown sa isla sang Panay agud ‘makudalan’ ang isla batok sa COVID-19

By: JoMaque | Marso 14, 2020

Iloilo — Ginsuhestyun ni Concepcion, Iloilo Mayor Raul Banias ang pag-“lockdown” sa Panay Island agud “makudalan” ang isla batuk sa COVID-19.       

Ginduso ini ni Banias sa consultative meeting sang mga mayors kahapon upod kay Governor Arthur Defensor Jr.

Sa panan-awan ni Banias nga isa man ka doktor, indi preparado ang Panay kun may makasulod na nga infected sang virus, gani mas maayo nga punggan ang pagsulod sini.

Ginhalimbawa ni Banias ang Iloilo City nga bisan madamo sang ospital, posible nga indi makasarang ang mga medical personnel sa pag-cater kun may COVID-19 patients na bangud may iban pa nga pasyente nga nagakinahanglan sang ila attention.

May geographic advantage ang Panay bilang isla suno kay Banias kag pwede gid nga makapatuman sang lockdown bangud may bastante nga pagkaun kag tubig ang isla.

Nagalaum ang alkalde nga ma-istoryahan ang iya suhestyun sa meeting sang Regional Development Council.

MABUDLAY MA-CONTAIN

Mabudlay nga ma-contain ang COVID-19 kun makasulod na sa Iloilo kag bug-os nga Panay Island.

 Gin-ako ni Banias nga mabudlay suno kay Banias ang iya rekomendasyon bangud may epekto sa ekonomiya, kag posible sa pamulitika, pero mas maayo nga matalakay ini sang mga governors kag local leaders sa Panay.       

Bisan may pondo suno kay Banias sa pagbakal sang kinahanglan nga equipment kag supplies pareho sang face mask, personal protective equipment ukon PPE suits, alcohol, thermal scanners kag iban pa, indi gihapon ini matabu bangud wala sang supply.

Nagapati man si Banias nga indi masarangan sang mga LGUs ang pagbato sang COVID-19 kun makasulod na sa Panay bangud wala bisan testing kits.