Community Quarantine sa Metro Manila, ginpatuman na

By: JoMaque | Marso 15, 2020

Manila — Ginpatuman na ang community quarantine sa Metro Manila sugod las-12 sa tungan gab-i kaina agud mapunggan ang paglapta sang coronavirus disease (COVID-19).

Gin-anunsyar ni Presidente Rodrigo Duterte ang community quarantine sang Marso 12 matapos ginbatak sa Code Red Sub-Level 2 ang sitwasyon sang Pilipinas sa COVID-19.

Gin-athag ni Presidente Duterte nga ginaproteksyunan lang sini ang publiko batuk sa balatian.

Bangud sini, restricted na ang pagbyahe sa halin kag padulong sa Metro Manila tubtob sa April 14, 2020.

Gin-deploy na sa borders sang National Capital Region ang mga uniformed personnel agud mapatuman sang local travel ban.

Ginpaguwa man sang Malacañan ang guidelines kun paano ipatuman sang gobyerno ang social distancing measures kag community quarantine sa Metro Manila.

Ang mga workers nga naga-istar sa guwa sang Metro Manila, pasugtan nga makasulod kag guwa sa Metro Manila pero dapat nga magpakita sang company ID ukon proof sang employment.

Indi man sini maapektuhan ang movement sang mga goods sa guwa kag sulod sang Metro Manila.