Iloilo Governor Arthur Defensor Jr., ginpatuman ang border restriction kag community quarantine bilang dugang nga precaution batok sa COVID-19
By: JoMaque | Marso 16, 2020
Iloilo City — Base sa Executive Order No. 028-C nga ginpirmahan ni Iloilo Governor Arthur Defensor Jr., ipatuman ang community quarantine sa bilog nga probinsya umpisa subong, Marso 15 tubtub Abril 14, 2020.
Nabutang sa EO nga indi na makasulod ang mga tawo sa probinsya magluwas lang sa :
1. Mga government officials kag empleyado nga maga-perform sa ila katungdanan
2. Medical personnel kag health workers/humanitarian workers nga may katungdanan may kaangtanan sa COVID-19 sa probinsya
3. Ang mga residente sang Iloilo City nga nagapadulong kag nagahalin sa probinsya sang Iloilo
4. Ang mga magabalik naman nga residente sa probinsya kag siyudad sang Iloilo ang may yara lang sang tubtub Marso 17 agud magbalik sa Iloilo.
Hugot nga iga-monitor sang probinsya ang mga naga-deliver sang goods kag services.
Nagpangabay naman ang gobernador sa mga pumuluyo nga likawan ang pagpadulong sa mga matawo nga lugar kun wala man lang sang importante nga kadtuan.
Gina-encourage ni Defensor ang mga pribado nga sector nga magpatuman sang flexible work arrangements.
Ginapanugyan naman sa tanan nga manufacturing, retail kag service establishments nga mangin bukas.
Dapat man suno sa iya nga i-obserbar ang social distancing measures.
Ginpahibalo sang gobernador ang suspension sang klase sa tanan nga level sa probinsya umpisa buwas, Marso 16 tubtub Abril 14.